काठमाडौं ।
देशभर बढ्दो जनआन्दोलन, विद्यार्थीमाथिको गोलीकाण्ड र सर्वसाधारणको चर्को आक्रोशबीच मुलुकका नेताहरू क्रमशः दबाबमा परेका छन्। जनताको आक्रोश दिनप्रतिदिन तीव्र बन्दै जाँदा नेताहरूले आफ्नो पद सुरक्षित गर्न सक्ने अवस्था नरहेको भन्दै धमाधम राजीनामा दिन थालेका छन्।
विश्वसनीय स्रोतका अनुसार, आन्तरिक दलगत विवाद, सडकबाट आएको व्यापक विरोध र आफ्नै कार्यकर्तामाझ असुरक्षा बढ्दै गएपछि उच्च पदस्थ नेताहरू पदत्याग गर्न बाध्य भएका हुन्। कतिपय नेताले जनताको आन्दोलनलाई सामाना गर्न नसकिने भन्दै "पदभन्दा ज्यान बचाउन जरुरी" ठानेर राजीनामा दिएको बुझिएको छ।
राजनीतिक विश्लेषकहरूले यसलाई जनशक्तिको ऐतिहासिक प्रभावको रुपमा व्याख्या गरेका छन्। उनीहरूका अनुसार जनताको दबाब अझै चर्को हुने हो भने अझ धेरै नेताहरूले आफ्नो पद छोड्नुपर्ने अवस्था आउनेछ।
यसैबीच सडकमा उत्रिएका आम नागरिकहरूले भने नेताहरूको राजीनामालाई जनताको जितको सुरुवातका रूपमा लिएको टिप्पणी गरेका छन्।
