काठमाडौं । पूर्वराष्ट्रपति विद्यादेवी भण्डारीले आफू अझै पनि नेकपा एमालेकै सदस्य भएको स्पष्ट पारेकी छन्। उनले पार्टीप्रति पूर्ण सहयोग रहने बताउँदै पार्टीभित्र देखिएका विकृति–विसंगति विरुद्ध लडिरहने प्रतिवद्धता व्यक्त गरिन्।
भण्डारीले भनिन्, “म नेकपा एमालेको सदस्य हो । मैले सिद्धान्त धारण गरेको छु । मैले त्यही अनुसार काम गर्ने हो । मेरो तर्फबाट पूर्ण सहयोग रहनेछ । पार्टीमा विकृति, विसंगति फैलाएको छ भने त्यसको विरोधमा म लडिरहनेछु।”
तर उनले पार्टी केन्द्रीय कार्यालय च्यासलकै नाम लिँदै आफ्नो सदस्यता माथि नै प्रश्न उठाइएको गुनासो गरिन्। “म निरन्तर काम गरिरहन्छु । हुन त मेरो सदस्यताको बारेमा प्रश्न उठेको छ, साथीहरू नेता भन्छन् । तर मेरो संगठित सदस्यताकै प्रश्न उठाएको छ, यो च्यासलले,” उनले भनिन्।
भण्डारीका अनुसार उनले एमाले मात्र नभई माले कालदेखि नै पार्टी सदस्यता लिएकी थिइन्। “०३७ सालमै लिएको हुँ । ४५ वर्ष भएछ । राष्ट्रपतिको शपथ खाँदा ३५ वर्ष भएको हो । पार्टीले निर्णय गरेर तपाईं जानैपर्छ भनेपछि मैले शपथ खाएको हुँ । मैले राष्ट्रका लागि मर्यादित भएर गर्नपर्ने काम गरेको छु,” भण्डारीले स्पष्ट गरिन्।
आफू आलोचनाभन्दा बाहिर नरहेको भन्दै उनले तथ्यमा आधारित भएर मात्र आलोचना गर्न आग्रह गरिन्। “म आलोचनाभन्दा बाहिर छैन । आलोचना गर्न सक्नुहुन्छ, तर तथ्यको आधारमा हुनुपर्छ,” उनले भनिन्।
भण्डारीले एमालेको मार्गदर्शक सिद्धान्त ‘जबज’लाई स्मरण गर्दै त्यसको मर्म र भावनाअनुसार काम गर्नुपर्नेमा जोड दिइन्। “नेकपा एमालेले जुन मार्गदर्शन सिद्धान्तको रुपमा जबजलाई लिएको छ, त्यसको मर्म र भावनाको आधारमा काम गर्ने हो । त्यसको मर्म र भावना अनुरुप काम भयो कि भएन भन्ने समीक्षा गर्ने बेला भएको छ,” पूर्वराष्ट्रपति भण्डारीले बताइन्।
