काठमाडौं उपत्यका अपराध अनुसन्धान कार्यालय, टेकुले सामाजिक सञ्जालमार्फत नक्कली परिचय बनाएर आर्थिक ठगी गर्ने एक युवकलाई पक्राउ गरेको छ।
कार्यालयले सार्वजनिक गरेको विज्ञप्तिअनुसार जिल्ला काभ्रेपलान्चोक, भूम्लु गाउँपालिका–८ घर भई हाल काठमाडौंको कपन बस्ने २७ वर्षीय शंकर लामालाई पक्राउ गरिएको हो।
लामाले फेसबुक, WhatsApp र TikTok मा नक्कली ID प्रयोग गरी विभिन्न व्यक्तिलाई Friend Request पठाउने, पछि पीडितसँग आत्मीय सम्बन्ध बनाउँदै रकम माग्ने, जागिरको नाममा रकम असुल गर्ने जस्ता गतिविधि गर्दै आएको प्रारम्भिक अनुसन्धानमा खुलेको प्रहरीले जनाएको छ।
उनलाई हाल आवश्यक अनुसन्धान र कारबाहीका लागि जिल्ला प्रहरी परिसर, काठमाडौंको पुतलीसडकमा बुझाइएको छ।
प्रहरी उपरीक्षक काजी कुमार आचार्यले सामाजिक सञ्जालमार्फत ठगीमा संलग्न अन्य व्यक्तिहरूमाथि पनि अनुसन्धान भइरहेको बताए।
📸 तस्बिर: काठमाडौं उपत्यका अपराध अनुसन्धान कार्यालय, टेकु
