२७ असार, काठमाडौं । सुनचाँदी व्यवसायीहरुको आन्दोलन स्थगित भएको छ । विरोधका कार्यक्रम स्थगित भएकोले शुक्रबारदेखि नियमित रूपमा पसलहरु खुल्ला हुने नेपाल सुनचाँदी व्यवसायी महासंघका द्वितीय उपाध्यक्ष धर्मसुन्दर बज्राचार्यले जानकारी दिए । धर्मसुन्दर बज्राचार्यले विहीबार सरकारसँग ६ बुँदे सहमति भएपछि व्यवसायीहरुको आन्दोलन स्थगित गरेको जानकारी समेत दिए ।विहीबार सरकारसँगको वार्तामा पूर्वमन्त्रीहरु छबिलाल विश्वकर्मा र मीनबहादुर विश्वकर्मा पनि सहभागी थिए ।
दुई प्रतिशत विलासिता कर र हीराजडित गहनामा १३ प्रतिशत भ्याटको व्यवस्थाले उपभोक्ता र व्यवसायी दुवैलाई असर पर्ने भन्दै फिर्ताको माग गर्दै व्यवसायीहरू एक महिनादेखि आन्दोलनमा उत्रिएका थिए ।सरकारले आर्थिक वर्ष २०८२/८३ को बजेटमार्फत् सुनको कारोबारमा दुई प्रतिशत विलासिता कर र हीराजडित गहनामा १३ प्रतिशत भ्याटको व्यवस्था गरेको थियो । व्यवसायीहरूको आन्दोलनले सुनचाँदीको भाउ समेत तोकिएको थिएन ।
विहीबार सरकारसँग अर्थ मन्त्रालयमा भएको वार्तामा व्यवसायीका माग सम्बोधन गर्न एक कार्यदल गठन गर्ने र विलासिताको परिभाषाभित्र राखिएको सुन तथा सुनका गहनाको सन्दर्भमा आवश्यक अध्ययन गरी पुनरवलोकन गर्न सिफारिस गर्ने सहमति भएको थियो भने कार्यदलले अध्ययन गरेर प्रतिवेदन पेस नगरेसम्म बजेटमार्फत वृद्धि भएको कर र भ्याटको व्यवस्था लागु नहुने सहमति समेत भएको तर तर सहमतिका बुँदामा भने त्यो कुरा उल्लेख नभएको नेपाल सुनचाँदी व्यवसायी महासंघका द्वितीय उपाध्यक्ष धर्मसुन्दर बज्राचार्यले जानकारी दिए।
